საგანმანათლებლო პროგრამაზე აკრედიტაციის მოსაპოვებლად საგანმანათლებლო დაწესებულებამ უნდა გაიაროს შემდეგი ეტაპები:

• ცენტრში წარმოადგინოს სააკრედიტაციო განაცხადი;
• თუკი დაწესებულების მიერ წარმოდგენილი დოკუმენტები იქნება წესრიგში , ხოლო აკრედიტაციის საფასური - გადახდილი, ცენტრის დირექტორის ბრძანებით, შეიქმნება აკრედიტაციის ექსპერტთა ჯგუფი, რომელიც დაწესებულებაში განახორციელებს ვიზიტს, აკრედიტაციის მოქმედი სტანდარტების შესაბამისად ადგილზე შეისწავლის არსებულ მდგომარეობასა და შეიმუშავებს დასკვნას;
• დასკვნის სრულყოფილად მოსამზადებლად აკრედიტაციის ექსპერტთა ჯგუფი გამართავს შეხვედრებს საგანმანათლებლო დაწესებულების ადმინისტრაციულ პერსონალთან, პროგრამის გამახორციელებელ აკადემიურ პერსონალთან, დამსაქმებლებთან/პოტენციურ დამსაქმებლებთან და სტუდენტებთან, ამ უკანასკნელის არსებობის შემთხვევაში (ექსპერტები შეირჩევიან იმ პირთაგან, რომლებსაც კონკურსის შედეგად მინიჭებული აქვთ აკრედიტაციის ექსპერტის სტატუსი);
• თუ დაწესებულება მიიჩნევს, რომ რომელიმე ექსპერტს/ექსპერტებს რაიმე სახის ინტერესთა კონფლიქტი აქვს მასთან, მას შეუძლია აცილების თაობაზე დასაბუთებით მომართოს ცენტრს. თუ იარსებებს აცილების რეალური საფუძველი, ცენტრი ჩაანაცვლებს ექსპერტს/ექსპერტებს;
• ცენტრი ვალდებულია დასკვნა დროულად გააცნოს დაწესებულებას, რადგან აკრედიტაციის საბჭო სხდომაზე მსჯელობს სწორედ ექსპერტთა დასკვნის საფუძველზე;
• საგანმანათლებლო პროგრამის აკრედიტაციის საკითხი წყდება აკრედიტაციის საბჭოს სხდომაზე. განხილვაში, საბჭოს წევრებთან ერთად, მონაწილეობენ ექსპერტები, დაწესებულების წარმომადგენლები და სხვა დაინტერესებული პირები. დაწესებულებას საშუალება აქვს წარმოადგინოს საკუთარი მოსაზრებები დასკვნაში დაფიქსირებულ შეფასებებსა და შენიშვნებზე. საბჭო ვალდებულია, ამომწურავად გამოიკვლიოს ყველა გარემოება, რომლებიც მნიშვნელოვანია გადაწყვეტილების მისაღებად. განხილვის შედეგად საბჭო იღებს გადაწყვეტილებას საგანმანათლებლო პროგრამის აკრედიტაციასთან დაკავშირებით (მინიჭების ან უარის თქმის შესახებ).

აკრედიტაცია ადგენს ხარისხის ნიშნულს, რომლის მიხედვითაც ფასდება საგანმანათლებლო პროგრამის ხარისხის დონე. ამ მოსაზრებაზე დაყრდნობით, პროგრამების აკრედიტაციის საფუძველზე გაიცემა სახელმწიფო სასწავლო გრანტი და სახელმწიფო სასწავლო სამაგისტრო გრანტი (უმაღლეს საგანმანათლებლო პროგრამებზე).

სააკრედიტაციო განაცხადის ფორმა განსაზღვრული არ არის. სააკრედიტაციო განაცხადი წარმოადგენს ჩვეულებრივ წერილს, რომელიც იწერება ცენტრის დირექტორის სახელზე და რომელშიც დაწესებულება გამოხატავს საგანმანათლებლო პროგრამის აკრედიტაციის გავლის სურვილს.

საგანმანათლებლო დაწესებულებამ სააკრედიტაციო განაცხადთან ერთად უნდა წარმოადგინოს შემდეგი დოკუმენტები:

•    თვითშეფასების შევსებული კითხვარი; აღნიშნული დოკუმენტის ფორმა  განთავსებულია ცენტრის ვებგვერდზე.

საგანმანათლებლო დაწესებულებამ მასში უნდა შეიტანოს რეალური ინფორმაცია სააკრედიტაციოდ წარმოდგენილ პროგრამასთან დაკავშირებით;  
•    სააკრედიტაციოდ წარმოდგენილი საგანმანათლებლო პროგრამა სილაბუსებთან ერთად, მათ შორის ელექტრონული ფორმით. 
•    სააკრედიტაციო განაცხადის განხილვის საფასურის (500 ლარის) გადახდის დამადასტურებელი ქვითარი;

საგანმანათლებლო პროგრამის აკრედიტაციასთან დაკავშირებით გადაწყვეტილებას იღებს საგანმანათლებლო პროგრამების აკრედიტაციის საბჭო, რომლის წევრებსაც საქართველოს განათლებისა და მეცნიერების სამინისტროს წარდგინებით, თანამდებობაზე ნიშნავს და ათავისუფლებს საქართველოს პრემიერ-მინისტრი.

აკრედიტაციის საბჭოს უფლებამოსილების ვადა ერთი წელია. 

აკრედიტაციის თაობაზე გადაწყვეტილება მიიღება აკრედიტაციის საფასურის გადახდიდან 180 კალენდარული დღის განმავლობაში (საქართველოს კანონი განათლების ხარისხის განვითარების შესახებ; თავი IV/მუხლი 22).

საგანმანათლებლო პროგრამას აკრედიტაცია ენიჭება 7 წლის ვადით.

განათლების ხარისხის განვითარების ეროვნული ცენტრის მიერ შემუშავებულია ხარისხის უზრუნველყოფის სახელმძღვანელო უმაღლესი საგანმანათლებლო პროგრამისათვის. სახელმძღვანელოს გაცნობა შესაძლებელია ბმულზე.

აკრედიტაციის საბჭოს სხდომის ოქმები და გადაწყვეტილებები ქვეყნდება ცენტრის ვებგვერდზე (ბმული) - სხდომის დასრულებიდან 10 სამუშაო დღის ვადაში.

აკრედიტაციის საბჭოს სხდომა საჯაროა და დასწრება შეუძლია ნებისმიერ პირს. გამონაკლის შემთხვევებში, იგი შეიძლება დახურულად გამოცხადდეს და, შესაბამისად, დასწრება შეიზღუდოს.

აკრედიტაციის საბჭოს გადაწყვეტილების გასაჩივრება აკრედიტაციის თაობაზე შესაძლებელია სააპელაციო საბჭოში, თუ საგანმანათლებლო დაწესებულება არ ეთანხმება მას. გადაწყვეტილება შეიძლება გასაჩივრდეს სასამართლოშიც. გასაჩივრება ხდება ქალაქ თბილისის საქალაქო სასამართლოს ადმინისტრაციულ საქმეთა კოლეგიაში შემდეგ მისამართზე: დ. აღმაშენებლის ხეივანი, მე-12 კმ, №6.

განსაზღვრულია გასაჩივრების ვადა და იგი დაინტერესებული პირისათვის, საბჭოს გადაწყვეტილების ოფიციალურად გაცნობიდან, 1 თვეა.

აკრედიტაციის პირობების შემოწმების მიზნით, საგანმანათლებლო დაწესებულება, რომელიც ახორციელებს აკრედიტებულ პროგრამას/პროგრამებს, ვალდებულია ცენტრს არანაკლებ სამ წელიწადში ერთხელ წარუდგინოს თვითშეფასების ანგარიში. თვითშეფასების ანგარიშის წარდგენის ვადები განისაზღვრება ცენტრის დირექტორის ინდივიდუალური ადმინისტრაციულ-სამართლებრივი აქტით.

თუ აკრედიტაცია გაუუქმდება ისეთ პროგრამას, რომლის განხორციელებაც შესაძლებელია აკრედიტაციის გარეშე, სახელმწიფოსგან დაუფინანსებლად, ამ პროგრამის სტუდენტებს აქვთ არჩევანი - გადავიდნენ სხვა საგანმანათლებლო დაწესებულების შესაბამის პროგრამაზე, ან გააგრძელონ სწავლა აღნიშნულ პროგრამაზე, სახელმწიფო დაფინანსების მიღების გარეშე. ხოლო თუ აკრედიტაცია გაუუქმდება ისეთ საგანმანათლებლო პროგრამას, რომელიც ვერ განხორციელდება აკრედიტაციის გარეშე, ამ პროგრამის სტუდენტები უნდა გადავიდნენ სხვა საგანმანათლებლო დაწესებულების შესაბამის პროგრამაზე.

თუ დაწესებულების რომელიმე საგანმანათლებლო პროგრამას გაუუქმდება აკრედიტაცია, დაწესებულებას  ავტორიზაციის საფუძველზე მაინც შეუძლია განაგრძოს საგანმანათლებლო საქმიანობა.

საგანმანათლებლო პროგრამის (გარდა რეგულირებადი, მასწავლებლის მომზადების, ქართულ ენაში მომზადებისა და დოქტორანტურის საგანმანათლებლო პროგრამებისა) აკრედიტაციის საფასურის ოდენობა შეადგენს 2233 ლარს (მივლინების საჭიროების გარეშე), ხოლო 3008 ლარს (მივლინების საჭიროების შემთხვევაში).

დაწესებულებას  პროგრამის აკრედიტაციისთვის გადახდილი თანხა დაუბრუნება მხოლოდ იმ შემთხვევაში, თუკი დაწესებულება ექსპერტთა ჯგუფის ვიზიტის განხორციელებამდე ცენტრს მიმართავს სააკრედიტაციო წარმოების შეწყვეტის მოთხოვნით. სხვა შემთხვევაში,  მიუხედავად იმისა, პროგრამას მიენიჭება თუ არა აკრედიტაცია, დაწესებულებას საფასური უკან არ უბრუნდება.

პროგრამის აკრედიტაციის შესახებ ცნობის მისაღებად მოგვმართეთ განცხადებით, რომელშიც აღნიშნავთ, რომელი დაწესებულების რომელი პროგრამის აკრედიტაციის შესახებ გესაჭიროებათ ცნობა. განცხადება შეგიძლიათ გამოგზავნოთ ცენტრის ოფიციალურ ელექტრონულ ფოსტაზეც: info@eqe.ge. ცნობა გაიცემა 15 სამუშაო დღის ვადაში. ცნობის გაცემა უფასოა.

აკრედიტაციის განაცხადის განხილვის საფასური შეადგენს 500 ლარს.