ავტორიზაციის საბჭომ შეიძლება მიიღოს სამი სახის გადაწყვეტილება:

• მიანიჭოს ავტორიზაცია
  (თუ დაწესებულება აკმაყოფილებს ავტორიზაციის ყველა სტანდარტს). გადაწყვეტილების მიღების შემთხვევაში, საბჭო უფლებამოსილია ავტორიზაციის მაძიებელ დაწესებულებას მისცეს რეკომენდაციები;
  
  
• უარი უთხრას ავტორიზაციის მინიჭებაზე
  (თუ დაწესებულება ვერ აკმაყოფილებს ავტორიზაციის ერთ-ერთ სტანდარტს);
  
  
• გაუუქმოს ავტორიზაცია
  (თუ დაწესებულებას დარღვეული აქვს ავტორიზაციის სტანდარტი/სტანდარტები).

პროცედურები ავტორიზაციის მოსაპოვებლად:

ა) საავტორიზაციო განაცხადის წარდგენა;
ბ) საგანმანათლებლო დაწესებულების სტატუსის მაძიებლად ცნობა;
გ) ავტორიზაციის ექსპერტთა ჯგუფის შექმნა;
დ) ავტორიზაციის ექსპერტთა ჯგუფის მიერ ავტორიზაციის თვითშეფასების ფორმისა და მასზე თანდართული დოკუმენტაციის წინასწარი შესწავლა და ვიზიტის დღის წესრიგის შემუშავება;
ე) საავტორიზაციო ვიზიტის განხორციელება;
ვ) ავტორიზაციის ექსპერტთა ჯგუფის დასკვნის პროექტის შედგენა და ცენტრში წარდგენა;
ზ) ავტორიზაციის ექსპერტთა ჯგუფის დასკვნის პროექტის დაწესებულებისთვის გაცნობა;
თ) ავტორიზაციის ექსპერტთა ჯგუფის დასკვნის პროექტზე დაწესებულების არგუმენტირებული პოზიციის ცენტრში წარდგენა დასკვნის პროექტში ასახულ ფაქტობრივ გარემოებებთან დაკავშირებით;
ი) ავტორიზაციის ექსპერტთა ჯგუფის მიერ დასკვნის საბოლოო სახით ჩამოყალიბება და ცენტრში წარდგენა;
კ) ავტორიზაციის ექსპერტთა ჯგუფის დასკვნის დაწესებულებისთვის გაცნობა;
ლ) საავტორიზაციო განაცხადის, ავტორიზაციის ექსპერტთა ჯგუფის დასკვნისა და ექსპერტთა ჯგუფის დასკვნის პროექტზე დაწესებულების მიერ ცენტრისთვის წარდგენილი არგუმენტირებული პოზიციის შესაბამისი ავტორიზაციის საბჭოს წევრებისთვის გაგზავნა;
მ) ავტორიზაციის საკითხზე ზეპირი მოსმენის გამართვა და შესაბამისი ავტორიზაციის საბჭოს მიერ გადაწყვეტილებისმიღება;
ნ) დასაბუთებული გადაწყვეტილების ცენტრის მიერ გამოქვეყნება.

ავტორიზაცია არის საგანმანათლებლო დაწესებულების სტატუსის მოპოვება, ანუ, დაწესებულებამ საგანმანათლებლო საქმიანობა რომ განახორციელოს, იგი უნდა იყოს ავტორიზებული. მხოლოდ ავტორიზებული საგანმანათლებლო დაწესებულება გასცემს სახელმწიფოს მიერ აღიარებულ განათლების დამადასტურებელ დოკუმენტს - დიპლომს. ავტორიზაცია სავალდებულოა ზოგადსაგანმანათლებლო, პროფესიული და უმაღლესი საგანმანათლებლო დაწესებულებებისთვის.

საგანმანათლებლო დაწესებულებების ავტორიზაციის მიზანია შესაბამისი საქმიანობის განხორციელებისათვის აუცილებელი სტანდარტების დაკმაყოფილების უზრუნველყოფა.

საავტორიზაციო განაცხადის ფორმა განსაზღვრული არ არის. საავტორიზაციო განაცხადი წარმოადგენს ჩვეულებრივ წერილს, რომელიც იწერება ცენტრის დირექტორის სახელზე და რომელშიც საგანმანათლებლო დაწესებულება გამოხატავს ავტორიზაციის გავლის სურვილს.

•    თვითშეფასების შევსებული კითხვარი; აღნიშნული დოკუმენტის ფორმა  განთავსებულია ბმულზე.

საგანმანათლებლო დაწესებულებამ კითხვარში უნდა შეიტანოს რეალური ინფორმაცია საკუთარ მატერიალურ და ადამიანურ რესურსებთან და საგანმანათლებლო პროგრამებთან დაკავშირებით;  
•    საგანმანათლებლო საქმიანობის მომწესრიგებელი დოკუმენტის დამოწმებული ასლი; ეს შეიძლება იყოს წესდება, დებულება და სხვა. 
•    ავტორიზაციის განაცხადის განხილვის საფასურის (500 ლარის) გადახდის დამადასტურებელი ქვითარი

ზოგადსაგანმანათლებლო დაწესებულების ავტორიზაციასთან დაკავშირებით გადაწყვეტილებას იღებს ზოგადსაგანმანათლებლო დაწესებულებების ავტორიზაცის საბჭო;

პროფესიული საგანმანათლებლო დაწესებულების ავტორიზაციასთან დაკავშირებით - პროფესიული საგანმანათლებლო დაწესებულებების ავტორიზაცის საბჭო;

უმაღლესი საგანმანათლებლო დაწესებულების ავტორიზაციასთან დაკავშირებით უმაღლესი საგანმანათლებლო დაწესებულებების ავტორიზაციის საბჭო.

ავტორიზაციის შესახებ ან ავტორიზაციაზე უარის თქმის შესახებ გადაწყვეტილება მიიღება დაწესებულების სტატუსის მაძიებლად ცნობიდან 180 კალენდარული დღის განმავლობაში.

ავტორიზაციის ვადა 6 წელია ყველა სახის საგანმანათლებლო დაწესებულებისათვის.

ავტორიზაციის საბჭოების სხდომის ოქმები და გადაწყვეტილებები ქვეყნდება ცენტრის ვებგვერდზე (ბმული) - სხდომის დასრულებიდან 10 სამუშაო დღის ვადაში.

ცენტრის ვებგვერდზე ქვეყნდება ექსპერტთა ჯგუფის დასკვნაც.

სხდომა საჯაროა და დასწრება შეუძლია ნებისმიერ პირს. გამონაკლის შემთხვევებში, იგი შეიძლება დახურულად გამოცხადდეს და, შესაბამისად, დასწრება შეიზღუდოს.

ავტორიზაციის საბჭოს გადაწყვეტილების გასაჩივრება შესაძლებელია, თუ საგანმანათლებლო დაწესებულება არ ეთანხმება მას.

გადაწყვეტილების გასაჩივრება შესაძლებელია კანონმდებლობით დადგენილი წესით და ვადაში, საპელაციო საჩივრის სააპელაციო საბჭოში წარდგენის გზით (მისამართი: ქ. თბილისი, მ. ალექსიძის ქ.N1) ან ქ. თბილისის საქალაქო სასამართლოს ადმინისტრაციულ საქმეთა კოლეგიაში სარჩელის შეტანის გზით (მისამართი: დ. აღმაშენებლის ხეივანი, მე-12 კმ, №6).

ავტორიზაციაზე უარის თქმის ან გაუქმების შესახებ გადაწყვეტილება მიიღება იმ შემთხვევაში, თუ დაწესებულება ვერ აკმაყოფილებს ავტორიზაციის თუნდაც  რომელიმე  ერთ სტანდარტს.

მონიტორინგის შედეგად, ავტორიზაციის ექსპერტთა ჯგუფის დასკვნის საფუძველზე, შესაბამისი საბჭო უფლებამოსილია, მიიღოს გადაწყვეტილება ავტორიზაციის გაუქმების შესახებ, თუ საგანმანათლებლო დაწესებულება არღვევს ავტორიზაციის სტანდარტს ან საგანმანათლებლო სფეროში საქართველოს კანონმდებლობის ნორმებს საგანმანათლებლო დაწესებულების მოსწავლის, პროფესიული სტუდენტის ან სტუდენტის სტატუსის წარმოშობასთან,შეჩერებასთან ან შეწყვეტასთან დაკავშირებით.

დარღვევის გამოვლენის შემთხვევაში შესაბამისი საბჭო უფლებამოსილია, საგანმანათლებლო დაწესებულებას ხარვეზის გამოსასწორებლად განუსაზღვროს არაუმეტეს 60 დღის ვადა, გარდა იმ შემთხვევისა, თუ აშკარაა, რომ ამას შედეგი არ მოჰყვება.
60-დღიან ვადაში დაწესებულების მიერ შესაბამისი ხარვეზების გამოუსწორებლობის შემთხვევაში, საბჭო უფლებამოსილია მიიღოს გადაწყვეტილება ავტორიზაციის გაუქმების შესახებ.

მოქმედ საგანმანათლებლო დაწესებულებას ავტორიზაცია გაუუქმდება, თუ მისი პირობები აღარ შეესაბამება ავტორიზაციის რომელიმე ერთ-ერთ სტანდარტს, აგრეთვე, თუ მან დაარღვია საგანმანათლებლო დაწესებულების მოსწავლის, პროფესიული სტუდენტის ან სტუდენტის სტატუსის წარმოშობასთან, შეჩერებასთან ან შეწყვეტასთან დაკავშირებით არსებული წესები.

ავტორიზაციაზე უარის თქმისა ან ავტორიზაციის გაუქმების შემთხვევაში:
დაწესებულება ვერ მოიპოვებს/კარგავს საგანმანათლებლო დაწესებულების სტატუსს;

მოსწავლეებს უფლება აქვთ, გადავიდნენ სხვა შესაბამის დაწესებულებაში;

პროფესიულ სტუდენტებს/სტუდენტებს 5 წლის განმავლობაში უჩერდებათ სტატუსი და უფლებამოსილნი არიან ისარგებლონ მობილობის უფლებით. ასეთ შემთხვევაში, მათ უღიარდებათ უკვე მიღებული განათლება.

თუკი საგანმანათლებლო დაწესებულებას გაუუქმდება ავტორიზაცია, იგი დაკარგავს საგანმანათლებლო დაწესებულების სტატუსს და დაუყოვნებლივ უნდა შეწყვიტოს ფუნქციონირება.

ავტორიზაციის პირობების შემოწმების მიზნით, საგანმანათლებლო დაწესებულება ვალდებულია, ცენტრს არანაკლებ სამ წელიწადში ერთხელ წარუდგინოს თვითშეფასების ანგარიში. თვითშეფასების ანგარიშის წარდგენის ვადები განისაზღვრება ცენტრის დირექტორის ინდივიდუალური ადმინისტრაციულ-სამართლებრივი აქტით. დაწესებულების მხრიდან თვითშეფასების ანგარიშის წარმოდგენის ვადის დარღვევის ან წარმოუდგენლობის შემთხვევაში, ცენტრი უფლებამოსილია განახორციელოს მონიტორინგი  დაწესებულებაში არსებული მდგომარეობის  ავტორიზაციის სტანდარტებთან შესაბამისობის დადგენის მიზნით.

საგანმანათლებლო დაწესებულებების მიერ ავტორიზაციის პირობების შესრულების შემოწმების ყველაზე თვალსაჩინო ფორმაა მათ მიერ ცენტრში თვითშეფასების ანგარიშის წარმოდგენა. ამასთან, ცენტრის ინიციატივით, ხარისხის უზრუნველყოფის შესაბამის სამსახურს შეუძლია გადაამოწმოს, თუ რამდენად აკმაყოფილებს დაწესებულება ავტორიზაციის სტანდარტებს.

მონიტორინგის განხორციელების სიხშირე, დიდწილად, დამოკიდებულია ცენტრში შემოსული იმ ინფორმაციის რაოდენობაზე, რომელიც შეეხება დაწესებულებების მიერ ავტორიზაციის სტანდარტების დარღვევის ფაქტებს.

ცენტრის დირექტორის ინდივიდუალური ადმინისტრაციულ-სამართლებრივი აქტი ავტორიზაციის ექსპერტთა ჯგუფის შექმნისა და დაწესებულებაში მონიტორინგის ვიზიტის შესახებ დაწესებულებას წარედგინება უშუალოდ ვიზიტის დაწყების წინ ან არაუმეტეს მონიტორინგის ვიზიტამდე 1 დღით ადრე.

ავტორიზაციის საფასური, გარდა ავტორიზაციის განაცხადის განხილვის საფასურისა, სრულად ბრუნდება, თუ საგანმანათლებლო დაწესებულება ადმინისტრაციული წარმოების შეწყვეტას მოითხოვს ავტორიზაციის ექსპერტთა ჯგუფის შექმნამდე.

სხვა შემთხვევაში, მიუხედავად იმისა, მიენიჭება თუ არა დაწესებულებას ავტორიზაცია, საფასური უკან არ ბრუნდება.

უმაღლეს საგანმანათლებლო დაწესებულებას შეუძლია განახორციელოს პროფესიული საგანმანათლებლო პროგრამები, თუ იგი დააკმაყოფილებს ავტორიზაციის შესაბამის სტანდარტებს.

ზოგადსაგანმანათლებლო დაწესებულებას უფლება აქვს განახორციელოს პროფესიული საგანმანათლებლო პროგრამები, გარდა მეოთხე და მეხუთე საფეხურების პროგრამებისა, თუ იგი შეძლებს ავტორიზაციის შესაბამისი სტანდარტების დაკმაყოფილებას.

ავტორიზაციის საბჭოს წევრებს საქართველოს განათლებისა და მეცნიერების სამინისტროს წარდგინებით ნიშნავს და ათავისუფლებს საქართველოს პრემიერ-მინისტრი.

ავტორიზაციის საბჭოების წევრთა შერჩევის წესსა და კრიტერიუმებს საქართველოს კანონმდებლობა არ ითვალისწინებს. თუმცა, პროცესის გამჭვირვალობისა და ღიაობის მიზნით, სსიპ - განათლების ხარისხის განვითარების ეროვნულმა ცენტრმა ავტორიზაციის საბჭოების წევრობის კანდიდატთა შერჩევისას უზრუნველყო საგანმანათლებლო დაწესებულებების, ექსპერტების, სამოქალაქო სექტორის, საერთაშორისო ორგანიზაციების ჩართულობა.

საბჭოების წევრთა უფლებამოსილების ვადა განისაზღვრება 1 წლით.

თითოეული საბჭო შედგება 9 წევრისაგან.

საბჭოს წევრი არ შეიძლება იყოს საჯარო მოხელე.

საგანმანათლებლო დაწესებულებების ავტორიზაციის საბჭოების ერთ-ერთი მნიშვნელოვანი ფუნქციაა მოსწავლეთა, სტუდენტთა, პროფესიულ სტუდენტთა ადგილების რაოდენობის განსაზღვრის, ასევე გაზრდის შესახებ გადაწყვეტილების მიღება. ამგვარი გადაწყვეტილებები შეიძლება დაეფუძნოს დაწესებულების საგანმანათლებლო პროგრამის თავისებურებებს, საგანმანათლებლო პროგრამის განმახორციელებელი პერსონალის რაოდენობასა და მათ კვალიფიკაციას, ასევე, მატერიალურ რესურსს, რომელიც იძლევა შესაბამისი რაოდენობის მოსწავლეთათვის, პროფესიული სტუდენტთათვის, სტუდენტთათვის მომსახურების გაწევის შესაძლებლობას.

ადგილების ზღვრული რაოდენობა განისაზღვრება საგანმანათლებლო დაწესებულებისთვის ავტორიზაციის მინიჭებისთანავე. თუმცა, ზემოთ აღნიშნული პარამეტრების ცვლილების (გაზრდის ან გაუმჯობესების) შემთხვევაში, დაწესებულებას ნებისმიერ დროს შეუძლია მიმართოს ცენტრს კონტინგენტის გაზრდის თხოვნით. ასეთ შემთხვევაში, შესაბამისი საბჭო იმსჯელებს და მიიღებს გადაწყვეტილებას.

სტუდენტთა ადგილების ზღვრული რაოდენობის გაზრდის შესახებ განაცხადის წარდგენის საფასურია 800 ლარი.

ავტორიზაციის განაცხადის განხილვის საფასური შეადგენს 500 ლარს.

საგანმანათლებლო დაწესებულება, რომელსაც სურს დაიმატოს შესაბამისი პროფესიული საგანმანათლებლო პროგრამა/პროგრამები, იხდის საფასურს, რომლის ოდენობა გამოითვლებაექსპერტთა ჯგუფის სამუშაოს მოცულობის – კაც/დღეების რაოდენობის მიხედვით.

ზოგადსაგანმანათლებლო   დაწესებულება , რომელსაც სურს მოსწავლეთა ადგილების რაოდენობის გაზრდა ,  იხდის   საფასურს ,  რომლის  ოდენობა გამოითვლება   ექსპერტთა ჯგუფის სამუშაოს მოცულობის კაც / დღეების   რაოდენობის მიხედვით.

სტანდარტი არის სახელმწიფოს მიერ დაწესებული მოთხოვნა, რომელსაც უნდა აკმაყოფილებდეს დაწესებულება სახელმწიფოს მიერ აღიარებული განათლების დამადასტურებელი დოკუმენტის გასაცემად.